【不是劇評】番睇《我和殭屍有個約會1,2,3》
因為亞視重播，勾起咗番睇《我和殭屍有個約會》條癮，
呢幾日就廢寢忘餐一集接一集咁煲晒三輯，總共睇咗過百集……
想睇番第一輯，純粹因為細個睇過，覺得好睇。
同埋，寫嘢寫到悶悶地搵啲嘢睇下，仲可以話「搵下靈感」嚟做借口懶下。
其實戒咗煲劇好耐，因為我份人好容易沉迷一樣嘢，
一投入咗就不能自拔直到天昏地暗，所以我禁住自己，
唔玩轉珠、唔睇《running man》、《來自星星的你》、Uninstall 《League of Legends》，都OK忍到，
唯一禁唔住嘅只有睇書寫作，同埋……喜歡一個人。
結果，開咗第一集睇，果然，睇下又一集。
睇到第一輯大結局之後，飲杯水，又繼續第二輯，死火。
睇第二輯都只係未夠喉，想知套劇點發展，未係話嘆為觀止，直至第三輯……成為我最鍾意嘅一輯。
以前應該無追到，因為對劇情完全無印象，可以話係睇一套新劇。當年收視好似麻麻地，但依家睇番就好吸引我，有兩個地方特別鍾意。
第一係劇情上整體黎講好緊扣。雖然好多人話漏洞多多，唔合情理，況天佑自己都唔多鍾意份劇本，覺得太多BUG唔多好睇。
編劇陳十三都只能夠解釋話科幻故事本質上就唔可以用平常嘅邏輯去理解，BUG係有，但佢花嘅心思，伏筆嘅精彩令我繼續愛上創作，明白點解寫嘢係咁好玩。
頭一兩集好細微嘅地方，每一集每個情節都原來都影響緊個結局。唔好話MISS咗一集，MISS咗一句對白或者一個表情，都可能會唔明啲局中局中局。
大結局個集更加出現咗個唔知新唔新但就好大膽嘅構思，初時會覺得吓，咁都得，少少膠喎，但咁樣玩法，令人不得不佩服，勇氣可加。
第二係大量嘅感情線。煩，老套，又係三角戀……我都係咁諗。初時一到言情位我就飛晒佢，特別喺呢一部每個角色幾乎都有條線，連一個小配角都有。
飛下又係談情，再飛都仍然係說愛，一個又一個浪淹埋黎，我終於失守。由煩變成吸引係因為雖然出現咁多段情，但每段都好獨特，有懦弱、有自私佔有、有學懂放下、有心靈相通、有一見鍾情、有忘卻時間……大家都有大家嘅唯一，每一個都係為愛傾盡。
套劇嘅大主題係：「愛係所有力量之中最大，連命運都可以改變。
現實中，情感上的確充滿好多令人無奈嘅地方，浪漫都好容易變質。不過我仍然深信愛情可以好偉大，有人會依然去願意不昔一切愛一個人，純粹只為一份簡單嘅愛，係唔知點解，都無任何條件，但就至死不渝，夢中見，亦高興。
平淡才是最困難。
假若我筆下的男女主角能夠重新找到一段感情，希望他們也可以「真的再有個約會會完成，真的會再有這樣深情，我以天為証，跟你帶領」……
Search